Revendee Jennylis Saudin (Koubasanan Dusun Labuk)

Intutunai koubasanan Dusun Labuk

Wookon kosuulon do mogiigiyon Dusun Labuk nopo nga’ tuunion koubasanan diolo’ i momoguno do tagung om kulintangan. Loyuk di noubasanan nopo id watas Labuk nga’ ointutunan do ‘Titik Tungkil’, om haro nogi’ i koboros do kolooloyukon koubasanan diti nopo nga’ pongintutunan montok mogigiyon dilo’.

Titik Tungkil nopo nga’ loyuk di asarok om sopisuai kopio di doun koubasanan tinaru Kadazandusun di suai. Ilo’ nopo do koubasanan nga’ parangahan ontok karaaramaian miagal do pisasawaan, ramai kokotuan om nogi’ monuau do tombului.

Titik Tungkil nga’ pongompot po nogi’ di sayau koubasanan mogiigiyon dilo’, ‘Magalai Labuk’ i soyohon do osongulunan toi mikombiso’ om kosoosoyoho’ nopo dilo’ nga’ tumanud di ponunulud do kondiu.

Tumanud sinusuyan tulun noloolohing, mantad no do adat di pogulu amu’ papasaga’ do kokusaian om koonduan sopiduuduo, sayau dilo’ kosili kosiwatan kumaa tangaanak woguan do monongkiuhang-uhang di tongo’ kosumandakan.

Oroitan do maamaso maasayau, kokusaian dilo’ papatahak di sapu tangan (koubasanan kiwotik aragang) kumaa sumandak di korohian dau om nung onuon di sumandak ilo’ nga’ kirati do asaga’ yau do uhangon di tanak wagu. Nung amu’ torimoon nga’ amu’ no yau muhang.

Suai ko’ tuunion om sayau, posokoton do mogiigion Dusun Labuk nga’ haro nogi’ kosuusuayan di poinpoopori. Posokoton dilo’ i pinungaranan do ‘Baju Labuk’ sinulaman do tusan kiwotik poinraaragang, obulou, otomou om osilou id ponong kangkab, tipus, id lunggayan om nogi’ id pompod soluar toi gaun.

Baju Labuk pinointutunan di Christina Paul Baklin songulun momowonsoi posokoton mantad Kampung Kuala Sapi di toun 1980an miampai angkab kosili ilo’ do kointutunan mogiigion Dusun Labuk.

Naamot dino, boros nopo do tulun Dusun Labuk nga’ kaagal-agal nogi’ di tinaru Kadazandusun di suai, nga’ sopisuai nopo do kolooloyukon om pamarait. Ingkaa po nogi’ o taakanon om tiinumon koubasanan, rusap-rusap, seni, tinunturu’ om sipoot koubasanan. Kaagal-agal ngaawi’ ilo’ di doun tinaru Kadazandusun di kogumuan.

By: Revendee Jennylis Saudin