By: Ermylla

Karamaian Tadau Kaamatan Pogun Sabah

Ponogulu

Tadau kaamatan nopo diti miagal do iso tadau tagayo do masyarakat kadazandusun id pomogun Sabah. Tudu nopo karamaian diti nga maan do mamaramai Tadau kaamatan toiko mamaramai do “Bambarayon”. Bambarayaon nopo diti lohowon do ‘semangat padi’ toi ko rusod do parai. Tulun kadazandusun otumbayaan  tadau tagayo do kaamatan nopo diti nga iso kotumbayanan di pinotungkus mantad komolohingan di gulu-gulu om gisom di baino. Suai ko mantad diri, otumbayaan nogi tulun kadazandusun montok do mamaramai tadau kaamaatan diti kaanu do ogumu barakat mantad kinorohingan di minamangun diti pomogunan.

Ogumu tongo ababayan toiko persembahan tulun do dusun soira orikot tadau kaamatan, miagal ko sumayau do sumazau, om unduk ngadau ,sugandoi om mogiginum do kinomol. Misusuai mongikut do tampat toiko rahas do kadazandusun. Kobasanan nopo piantakan do parayaan diti nga haro do tuni-uni miagal ko tagung, sosompoton toi ko kulintangan.

Tangon dii gulu-gulu

 Kewujudan nopo diti tadau kaamatan nga montok do tangan dongulu-gulu. Haro nogi pinungaranan roitan do kinorohingan (Tuhan) om sawo nopo dau pinungaranan do suminundu om kitanak nogi diolo do iso sumandak roitan i Huminodun. Montok do monguhup do tulun sumoliwan mantad koinggoritan di ingga takanon, tinumon om nogoriyou nogi ngawi tonggo parai om tua’ua.

Nopo dii pogulu, haro iso kakampungan kinoyonon dii kinorohingan om ngawi tompinai dau. Osonong om ogumu taakanon toiko tonom-tonomon id kampung dau. Insan tadau dii au’ oilaan, magadau tomod iti pomogunan om oinsanai i totonomon diolo nogoriyou.

Oinsanan tulun id kampung dumontol do koingoritan miampai . Orosi tomod diolo do ingaa taakanon om waing tinumon montok ingaa kosusuni dilo tonomon ngawi miagal toiko parai, tua’ua om nogi waig do bawang. Montok dii, minomilohou i kinorohingan do tulun tangapandai miagal toiko bobolian. Bobolian nopo diti nga oilaan om maran ngaran  tulun dii awasi om koilo nogi berhubung kumaa kuasa ghaib. Tujuan nopo linohou i’ bobolian nga montok popoilo om mongintutun nokuro tu mobus lombus magadau.

Pimboros no i bobolian om popoilo nunu osuhatan do mangan montok dii koingoritan do pomogun. Tumanud boros di bobolian, iso ralan di awasi montok manyalasai toi ko popotingkod diti korondomon do pomogunan nga mositi haro do raha tulun di osonong  koginawaan om kowowoyon montok do popoyopos om lumuyung id tana.

Montok dii, nokorongou nogi i Huminodun oinsanai ponguhatan dii tapa om tama dau kumaa i Bobolian. Mantad dii, minomusorou no kopipio iiso miampai di koingoritan onsanai tulun do pogun Kadazandusun.

Alansan daa i Huminodun do kapaganu do koposion di osonong kumaa oinsanai tulun kadazandusun miyoon id pogun dau.  Minomusorou  tomod  i Huminodun nunu kopio maan do mananpasi oinsaian pomogun dau. Minogoi nogi i Huminodun piruba  di Kinorohingan om tama dau i Suminundu do poposunud suang id ginawo dau do kasangup kakah iso do kopisangop toiko mengorbankan tinan dau montok popotingkod ilo koingoritan do dumopus magadau. Om alansan nogi i Huminodun do kolintuhun do darun momiopos diilo tonom-tonomon om  haro waig tinumon.

Tumongob nogi i kinorohingan om sawo dau montok pokionuan dii tanak diolo. Oilan ngawi tokou tuu ingaa tama toiko tapa dii kasangup do popologos  kapapataian taganak dau. Minomusorou kopipio i Kinorohingan montok pikionuan dii tanak dau, nga ingga po ralan suai. Montok diri pihubaian nopo di kakah pokionuan dii tanak dau.

Kosuaban mantad dii, migititimung ngawi-awi tulun pogun i Kinorohingan montok do momisunud do pokionuan di tanak dau. Oinsanai tompinai om tulun pogun au’ asanagan pokionuan dii Huminodun. Om haro nogi tulun minomisunud kada tanud id suanag ginawo toi ko pihubayai pokionuan di Huminodun.

Soira orikot sumodop, oinsanai tulun pongun om i Kinorohingan magangat i Huminodun id isokinoyonon di akawas toi ko osonong. Di maso amu po otimpunan ababayan diri, nga minomisunud no kakah i Huminod  kumaa molohing dau i Kinorohingan om i Suminundu “Ama, poluo iti turu rangodot paraai, poluo hilo tangob, koturu nopo rasam om, pasasadan noh ilo tuah dau”.Rati nopo dau hiti nga, minonuhu i Huminodun po’opi turu rawo parai id wakid om potonomon ka’agu soingira do rumasam.

Montok kapatayon di Huminodun  ogumu nodi tonom- tonomon i nokosuni om kitua di osonong  miagal ko parai. Mantad diri otumbayaan ngawi tulun dusun kumaa sunduan do parai i linohoo sabagi do “Bambarayon”.

Mantad dii, kakaal gisom baino tulun do Kadazan Dusun mamaramai tadau  do kaamatan omalansan nogi do ogumu kasanangan montok do koposian id abantalan. Om bagi pantangon kumaa kahandaman sunduan do parai dii no’omot om pinosuang hilo id suang do tangob.

Miampai di, kogumuantulun Kadazandusun id Sabah tongo kusai toiko tondu nga mananrasuk tulun Kadazan roitan do rasuk tradisi “Sumazau” toi ko di koubasanan.

Rahas Kadazandusun

Dii baino soginumu lebih kurang do 40 (apat nohopod) diti  rahas do Kadazandusun. Pomitanan Dusun Liwan, Dusun Tindal, Dusun Pahu, Dusun Lotud, Bagahak, Dusun Labuk, Dusun Kimaragang, Tagahas, Tangara, Dusun, Rungus, Orang Sungai, Kuijau, Tambanuo, om ogumu poh. Mogisuai-suai miagal rinda, jenis bahan om putungan rasuk sumazau mongikut do koubasanan. Suai mantad dii, mogisusuai pinotungkus di ababayan tumanud do rahas koubasanan. Sundung do ogumu rahas Kadazandusun id pogun Sabah nga, awasi om ongo suau ngawi.

Sayau Sumazau

Koubasanan montok do tadau kaamatan, haronogi ababayan sumayau miagal do sumazau. Maya do koubasanan, kogumuan tulun dusun di tumanud dilo sumyau nga mantad do tongo kusai om kosumandakan. Sumayau nopo diiti nga momolombus kumaa kasangan om kosyukuran kumaa kinorohingan dii minanahak  ngawi koposion id pomogunan. Miampai dii, haro tulun nokoboros  nunu nopo kobolingkahangan miagal toi ko panyakit, om monginsodu mantad karaatan toi ko monulang nga, atagak sokiro do sumayau piantakan dii tadau kaamatan. Koubasanan kawo nopo diti sayau sumazau nga au’ aparahat om opian. Soira sumayau mositi do haro koruhang toi ko mogipapasang miagal do tondu om kusai samada komulakan toi ko molohingan, om mitoguang.

Moginum do siopon

 

Montok tadau kaamatan, mogiginum nopo nga iso ababayan i koubasanan om pinotungkus mantad molohingan dii au’ atagakan gisom do baino. Mogiginum nopo iiti nga iso kotubayaan tulun Dusun kumaa do Bambarayon (semangat padi), adat miagal toikaramaian do momuhaboi, kapatayon, om mitatabang. Tudu nopo nga maan pantangon kumaa tompinai om oinsanai masyarakat dii norikot. Kinomol nopo diiti nga winonsoi mantad do wagas om sinampur do sasad. Tonokon no ilo wagas om ponosuangon id butul toiko kakanan om popion pipito tadau gisom do koonsok.

Soira kopongomot do parai, koubasanan tulun dusun dii mitatabang mogititimung om rumamai miampai do mogiginum om kipusas.

Unduk ngadau (Ratu cantik)

Unduk ngadau merujuk kepada semangat toi ko rusod dii Huminodun. Komoion do iso tondu di olumis om alawa miagal do rumandawi mantad id kayangan. Mantad di Unduk ngadau nopo diti nga iso wooyo mandtad kalawaan di Huminodun. Miampai dii, monikid toun soira  orikot do tadau kaamatan, koubasanan pogun id sabah momonsoi pialaan do unduk ngadau om okuab kumaa ngawi kosumandakan. Suai mantad di pialaan nopo diti, tikid toun ogumu tulun do rumikot om mamaramai om mongintongpialaan unduk ngadau mantad Kota Kinabalu, Pinampang,Tuaran, Tamparuli, Ranau, keninagu, Tambunan, Tenom, Telupid, Kota Belud, Kudat, Kota merudu, Kuala penyu, sandakan, om ogumu po.

Tuni-uni (Muzik)

Sosompoton

Koubasanan pogun sabah terutama soira orikot tadau kaamatan, ogumu ababayan di wonsoion miagal ko mamain do kakamot tunion miagal ko sosompoton, tagung, kulintangan om ogumu po. Tudu nopo papaharo kakamot tunion diti, maan do monginsonong unduk ngadau, sugandoi, sumayau sumazau om maso do kumawin. Pomitanan do suai, monikid toun do tadau kaamatan mositi haro sungandoi. Sungandoi nopo nga iso pertandingan do monsinding om terbuka kumaa oinsanai pogun sabah moingikut kategori.

Kolimpupusan

Mantad do tangon di Huminodun, tadau kaamatan nopo nga iso tinongkusan mantad yaki om todu tokou. Tudu nopo do kaamatan diti, maan do sabagi iso kounsikahan kumaa kinorohingan. Sabagi do sukod wagu mositi potilombuson ababayan koubasanan diti gidom sogigisom. Ogumu rati om kotumbayaan tulun Dusun montok diti sunduan do Bambarayon dii monginsonog do koposion id suang do pomogunan. Ogumu koinsikahan kumaa dii Kinorohingan kumaa kasanagon koposion dii baino.